【Mean Baby】毒男唔止要靚女 直頭係要星級女仔

話說有日，Mean Baby同事好興奮，但又有啲失落，因為佢同一位做公務員的客人溝通咗幾個月，終於同對方夾到時間做單對單約會咨詢，但因為嗰日佢要早走，所以就安排咗我去見佢。

好喇，時間到，終於可以同佢見面喇，誰不知......（！）佢同我地想像中嘅樣子大有出入，明明佢工作係應該需要大量體力，但點解會…咁瘦嘅？！嗰一刻Mean Baby覺得分分鐘自己都大力過佢。不過唔緊要，我要將自己少女心收番，用專業嘅一面了解下佢背景，同幫助佢。

本身傾落都冇乜野，佢只係俾我感覺靜啲，但到了解佢擇偶要求時，Mean Baby就開始覺得有啲怪。45歲嘅佢，一黎就話要搵20-29歲女仔，30歲都唔得。當我問佢係咪因為要考慮生育時，佢話唔係，話只係如果要搵呢個歲數以外女仔，佢好輕易喺出面搵到。

唔好意思，當時我即時心諗：「乜你咁有信心......？」到問佢另外有咩要求時，佢只係話「樣靚！」，正常都會講多兩句關於性格，佢答唔出，Mean Baby唯有指導佢，問係咪都要斯斯文文、溫柔？佢支吾以對，「嗯，都冇乜所謂 。 」

Mean Baby 一路指導佢，冇理由個profile寫個擇偶要求只係「樣靚」架嘛。同埋都有同佢講，佢要求嘅歲數女仔，好少要求佢呢個年齡層男士。因為我地唔想收咗佢錢幫唔到佢手，勸佢睇多啲唔同年齡女士，佢話佢都明，但都係好堅持唔可以過30歲。

到睇profiles時，我地俾咗唔同風格女仔佢睇，有啲樣子唔錯，都接受到佢嘅年齡，但佢望一望就話唔使介紹，連續飛咗好幾個。到望到一個以前做過model，真係好靚嘅女仔先話ok，要約佢。Mean Baby 好老實，話俾佢聽呢個成功配對機會唔高，只係俾佢參考，到最後，佢都只係揀約佢一個。

最後結果如我所料，佢被Reject了。之後都有介紹唔同女仔佢識，但個個佢都話唔ok，講真啲女仔真係唔錯架。同埋星級咁靚嘅女仔，根本不會揀佢，我哋也都有同佢講成功率唔高，因為作為配對顧問都要過濾架嘛。

佢收入唔算高，外表普通並十分之瘦，一直我地都說服佢考慮其他條件女仔，但佢好硬頸，都係要後生明星級女仔。最後佢配對唔成功，我地都照合約退款俾佢。不過呢個唔係我地樂見嘅情況，希望各位參加單對單約會或speed dating活動時，多啲聽我地專業意見！

上一篇Speed Dating單身資訊: 【名人愛情錄】 娛樂圈世紀賤男 引以為戒
下一篇Speed Dating單身資訊: 【Mean Baby】Sharp醒靚仔企業家，究竟有幾「筍」？